ميرنا الهلباوي: «اللي عملته يستحق.. وبطلت أتكسف أقول على نفسي إني كاتبة»
كتب: متابعات
احتفلت الكاتبة والروائية ميرنا الهلباوي بمرور «10» سنوات على دخولها مجال الكتابة، وتقديمها روايتين هما «مر مثل القهوة حلو مثل الشوكولا» و«كونداليني».
وكتبت ميرنا الهلباوي: «الشهر ده بحتفل إني بكتب بقالي ١٠ سنين.. دايمًا كنت ببقى مكسوفة إني أعرّف نفسي إني (كاتبة).. دايمًا كنت بشوف نفسي أصغر من إني أقول على نفسي "كاتبة".. بشوف إن كل اللي عملته برضه لسه مايدينش الحق إني أعرّف نفسي إني كاتبة.. يمكن جلد ذات.. يمكن ده كان بيّديني دافع إني أعمل حاجات أكتر».
وتابعت: «بس الشهر ده اكتشفت إني بقالي ١٠ سنين بكتب.. ١٠ سنين من كلمات وكلمات وكلمات.. ١٠ سنين من كلمات عملت مقالات رأي خلت برامج تلڤزيونية تتكلم عنها، ١٠ سنين من حوارات صحفية حصرية في الوطن العربي والعالم، ١٠ سنين فيها كتابين أكثر مبيعًا لحد دلوقتي، ١٠ سنين من ترشح لجوائز صحفية وأدبية عظيمة.. أنا بطلت أتكسف وبطلت أقلل من نفسي الشهر ده هحتفل بـ١٠ سنين كتابة.. الشهر ده هحتفل بنفسي عشان اللي عملته يستحق».
السيرة الذاتية لـ«ميرنا الهلباوي»
ولدت بمحافظة الإسكندرية، تخرجت في كلية السياحة والفنادق، عملت مقدمة برامج في الراديو، وكذلك في أحد البرامج بإذاعة «إنيرجي» تملك مدونة باسمها أطلقتها عام 2011، وبعدها عملت بالصحافة لمدة 5 سنوات بمجلة «7 أيام».
رُشحت لجائزة الصحافة العربية في 2016 عن فئة الحوار الصحفي، وحازت المركز الثاني، ويجري حاليا تحويل روايتها «كونداليني» لفيلم سينمائي.
