«سوزان تميم استنجدت بيا».. ممدوح موسى يكشف مفاجآت حول مقتل ذكرى (خاص)

كشف الإعلامي ممدوح موسى، تفاصيل تروى لأول مرة عن علاقة المطربة الراحلة سوزان تميم، برجل الأعمال الراحل أيمن السويدي زوج الفنانة ذكرى والتي قتلت على يده.

وقال ممدوح موسى، في ندوة فنية بموقع «العاصمة»: «أنا الوحيد في مصر اللي عملت حلقة لسوزان تميم.. وذكرى كانت متجوزة أيمن السويدي.. وأنا في التوقيت ده كنت بعمل برنامج «الأتوبيس».. خدت معايا سوزان تميم أسوان، كانت لسه نازلة مصر فالبنت كانت زي القمر وقالتلي أنا جيالك مخصوص من لبنان علشان اطلع في برنامجك».

تابع: «قولتلها طب يلا هنروح حلقة في أسوان.. وصورنا الحلقة، والحلقة اتذاعت وياريتها ما اتذاعت».

واستطرد: «وقتها أيمن السويدي شاف الحلقة وراح مكلمني قالي كان فيه واحدة طلعت معاك وعايز تليفونها تشتغل معايا في المطعم بتاعي فسألتها تشتغلي معاه، فوافقت».

واستكمل: «بعد فترة كلمني قالي صاحبتك مبترودش عليا، فكلمتها قولتلها ردي عليه.. قالتلي ده مجنون ده جابلي مسدس قدامي وحطهولي على الكنبة وقالي «يا أموتك يا اتجوزك» قالتله هتجوزك وقفلت الباب وبعد كده خلعت منه».

واختتم الإعلامي ممدوح موسى حديثه قائلا: «لقيتها بعد كده بتكلمني بتقولي ده أيمن قتل ذكرى وقتل اتنين معاها، قولتلها طب احمدي ربنا أنتي اللي كنتي هتموتي"، بعد كده عرفت أنه عمل المذبحة دي بس هي كانت هتموت بدل ذكرى في الأول».