فاروق فلوكس: «جالي جلطة بسبب مها أحمد»
كتب: شروق خالد
كشف الفنان فاروق فلوكس عن بعض الأسماء من الفنانين والفنانات اللذين لن يعمل معهم مجددًا ومن ضمنهم مها أحمد وعبد الرحمن أبو زهرة وذلك لأن الأولي أساءت له خلال عملهم سويًا بإحدي المسرحيات، ما أدى لإصابته بجلطة.
وأوضح "فلوكس" خلال استضافته مع الإعلامية راغدة شلهوب في برنامج "نص الكلام" المذاع على شاشة النهار بقوله: "بدأت أجرب كذا جملة، وفي مرة قولت جملة هي ردت عليا من فوق واعتبرته إفيه يعني وأنا مش داري، مضيفًا: "أنا بجرب الشخصية اللي بعملها، فجيت البروفا اللي بعدها مش متذكر أنا قولت إيه ولا الملقن كاتبها، فمقولتهاش".
وتابع: "لقيتها بتتكلم بصوت عالي وبتقولي فيه جملة هنا بتتقال وأنا برد عليها، فأنا اتفاجئت، هل ده احترام الأقدمية؟ هل ده احترام للمسرح؟ قولتلها أنا مش فاكر أنا قولت إيه، قالت لي: لا فاكر بدليل إنك مش عايز تقول علشان أنا قولت وراك إفيه، قولتلها: أنا؟ أنا مش عارف الجملة، لكن مش هقول لها عموماً، وبعد إذن الأستاذ المخرج أنا بستأذن شوية من البروفا".
واختتم "فلوكس" حديثه قائلا: "وبعدها جالي جلطة بسبب مها أحمد عشان زعقت فيا في كواليس المسرحية وزعلت على عمرى الفنى وعدم احترام الأقدمية وكل الناس جاتلي المستشفي إلا هى واعتذرت عن الشغل معاها".
