مهنة التعليق الصوتي تضع مسلسل «الهرشة السابعة» في ورطة لهذا السبب!

حالة كبيرة من الجدل تسبب فيها مسلسل "الهرشة السابعة" نتج عنها تصدره تريند محركات البحث على جوجل، بسبب هجوم معلقين الصوت على الحلقة السادسة بالمسلسل والتي اكتشفت فيها بطلة العمل أمينة خليل موهبتها في مهنة التعليق الصوتي "الدوبلاج بالصدفة".

سبب هجوم معلقين الصوت (الدوبلاج) على مسلسل الهرشة السابعة

قالت إحدى مستخدمي "الفيسبوك" وتدعى "منى شرقاوي": "الأستاذة أمينة خليل قررت تكتشف شغفها الي ابتدى التمهيد ليه من حلقة قبل كدة وهي بتلعب مع أولادها وبتغير صوتها زي ما أي أم في العالم بتعمل وهي بتلاعب أطفال، ودي حاجة بالمناسبة مش مؤشر أبدا للموهبة الصوتية بس السياق الدرامي عايز كدة فتمام".

وتابعت: " وفجأة يتجسد الشغف في أنها اتطلبت لتسجيل إعلان فجأة، وهذا أمر لو تعلمون عظيم، في ناس بتبتدي وتنتهي في مجالنا ده من غير ما يعرفوا يوصلوا لتسجيل إعلان تلفزيون وناس موهوبة وبتقعد سنين علشان تسجل إعلان واحد بس، لحد كدة وحنستحمل السياق الدرامي".

وأضافت: "إنما انت كصانع صورة، إللي الصوت جزء لا يتجزأ منها تكون سبب في أنك توصف مفهومك للصوت أنه شوية كراتيين بيض في أوضة بهذا الحجم ومايك مرمي في الفراغ مع موهبة اتولدت في ثانيتين وبقت مكسرة الدنيا مع مهندس صوت ميطلعش منه نصيحة زي المعالجة الصوتية الحزينة اللي محدش بيعملها دي ونصور المجال ده إنه بالدرجة دي من السطحية والبساطة والسهولة، يبقى احنا لسة بعاد قوي قوي قوي عن أن أي حد في مجال الميديا يفهم إحنا مين وبنعمل إيه وبنعمله إزاي وبنبذل مجهود قد ايه فيه وبنفضل نتعلم ونجرب قد ايه ويا نوصل لحاجة يا منوصلش".

وتابعت: "ونضيف على كدة طبعا الجمل بتاعة "إن دي حاجة مش شبهنا و إن الشغلانة دي مش مناسبة لينا" مش شبه مين حضرتك؟ معلش هو إحنا مش شبه مين علشان يتقال علينا كدة أو نروج لمجالنا بالشكل البايخ ده؟ومش مناسبة لإيه؟ هو احنا بنعمل حاجة غلط يا أستاذ كريم؟.. مش لازم علشان نخدم الدراما نضحي بسمعة وشكل مجال بحالة زي ما أمينة خليل الله يكرمها قالت.. المعلق الصوتي في مصر له الله والله".

مطالب بإنشاء نقابة لـ "التعليق الصوتي"

وقالت أخرى تدعى "أسماء نصير": "من أمنياتي المؤجلة أن يكون فيه كيان مثلا نقابة التعليق الصوتي لعدم الاستخفاف بالمجال".

مطالب بتقديم صناع مسلسل "الهرشة السابعة" اعتذار لـ معلقين الصوت

وطالب آخر يدعى عبد الباقي أحمد باعتذار صناع المسلسل عن تلك الإهانة التي طالت كل معلقين الصوت والمهنة في مصر.

ومن ناحية أخرى أشاد كريم صالح بالعمل وقال: "في حد ذاته أننا اتذكرنا دي خطوة إيجابية بغض النظر عن طريقة الطرح لكن احنا مهنة بنعمل أصعب حاجة بدون أي ذكر لدورنا ولأسامينا وكأن اللي سجل ده وحش وعبارة عن روبوت مش إنسان وليه حقوق أدبية".