ريهام سعيد: كل الناس وحشة ومش عايزة أكلم حد
كتب: محمود جودة
قالت الإعلامية ريهام سعيد، اليوم الخميس، أنها لا تبحث، حاليا عن فرصة عمل على الاطلاق، في رده على ما قاله البعض حول هذا الأمر، مؤكدة أنها تواجه حرب غير مبررة أو مفهومة في حياتها العملية وليس لديها أية اصدقاء مقربين يساندوها.
وقالت ريهام سعيد، في منشور عبر "فيسبوك": "شكرا علي كل الحب ده بس للتوضيح انا لو عايزه اشتغل ماكنتش سبت النهار و لو عايزه اشتغل كنت عملت برنامج علي اليوتيوب او اشتريت هوا في اي قناه. اظاهر الرساله وصلت غلط . انا مش حسه اني هاموت عشان مش بشتغل مذيعه انا حسه اني هاموت بجد عندي اوجاع في كل جسمي مش بقدر اخرج كتير".
وأضافت: "مش عايزه اكلم حد لان كل الناس وحشه اوي اوي معنديش رغبه اني اعيش و حسه اني هافارق اولادي قريب . انا معنديش اصحاب او اكتشفت ان معنديش اصحاب".
وقال ريهام سعيد: "انا تعبانه من الظلم الي اتظلمته تعبانه من الحرب الي شغاله لغايت دلوقتي . اي حد بيطلبني في برنامج حتي كضيفه بيعتذر لي بعدها. بترشح في مسلسلات بترفض. انا ممثله مسرح بعد ما جالي عروض اختفت الصحافه علي طول مصدره الوحش او الغلط زي ما يكون في حمله للقضاء علي اسمي من مين معرفش . ده غير كل التهم الي اتهمت بيها و هي كلها ظلم في ظلم".
وأضافت: "انا مش زعلانه اني مش علي الشاشه انا زعلانه علي عمري الي راح من غير تقدير زعلانه علي الايه المقلوبه زعلانه علي النفوس الكدابه المفتريه الي حوالينا زعلانه من الحرب الي ضدي الغير مبرره زعلانه ان مصير البني ادم بقي بيتحدد بناس قاعده ورا اجهزه او ماسكين تليفونات بيتسلوا علي اذيه البشر ".
وقالت: "أنا زعلانه علي البهدله الي شفتها.. صرفت كل فلوسي على محامين و قضايا عشان أفضل جنب الولادي ده غير فلوسي الي ماخذتهاش . عروض الشغل ماتمشيش خالص مع كفاءتنا او نجاحاتنا. انا كل الكرو بتاعي مش لاقي شغل الي عايز يشتغل سواق و الي …. مش عايزه اتكلم عشان مايزعلوش"
وقالت في منشورها: "رساله للكرو بتاعي المخلصين اللي فاضلين لو ممتش اوعدكوا ان ربنا هايرزقنا بحد ربنا هايختاره ضميره صاحي يخلينا اقوي من الاول و لو مت ربنا مش هاينسا احنا عملنا ايه و الله اجرنا عند الله . كفايه الناس الي بتقابلني و تقول لي ان اولادهم اتعلموا مننا كتير عارفه ان احنا و لا اتقدرنا ادبيا و لا عملنا اي فلوس لكن ربنا كبير . ادعولي اقوم . ادعولي الاوجاع الي عندي تروح الي الدكاتره مش عارفين سببها".
واختتمت بقولها: "ادعولي اقف علي رجلي تاني حتي لو ايامي قليله . لو مت يبقي الي قتلني الظلم . الي هايقول بتمثل و الي هايقول بتستعطف و الله ما هممني.يتفلق .لو في واحد سامعني وًحاسس بيه يدعيلي عشان انا بجد تعبانه اوي و مش هاستسلم و هاحاول اقف علي رجلي. علي فكره انا راضيه و الحمد لله علي كل حاجه".
